O C.B. Baixo Miño Basket participou o pasado 6 de agosto nas Festas do Monte da Guarda cunha actividade aberta a toda a veciñanza que reuniu no Auditorio de San Benito unha exhibición de minibasket, un concurso de habilidades e diferentes retos de lanzamento.

A iniciativa superou as expectativas do club, cunha importante participación de nenos, nenas e adultos alleos ao BMB e arredor de 50 persoas acompañando a actividade como público ao longo da tarde. Entre os participantes houbo mesmo visitantes chegados de lugares como Francia e Valladolid, aproveitando estes días de festa na Guarda.

A xornada permitiu achegar o baloncesto a persoas que non coñecían previamente o club e rematou con varias familias interesándose polos adestramentos e fotografando a información da nova tempada exposta na praza.

Unha exhibición decidida nos últimos segundos

A actividade comezou ás 19:00 horas cun partido de exhibición no que participaron 10 xogadores e xogadoras de minibasket do BMB, repartidos en dous equipos de cinco.
Fran Álvarez encargouse do equipo verde, mentres que Mauro Rodríguez dirixiu o equipo azul. O encontro foi arbitrado por Diego Simoes, membro da directiva do club.

E o partido non puido ter un final máis emocionante. Co encontro practicamente rematado, André anotou un triplo a falta de apenas dous segundos para colocar ao equipo azul un punto por diante. O equipo verde aínda tivo unha última oportunidade sobre a bucina cun lanzamento de tres puntos que finalmente non entrou.

O equipo azul levouse así a vitoria e os seus integrantes recibiron como premio unha mini canastra de baloncesto.

Preto de 30 participantes no concurso de habilidades

Tras a exhibición chegou unha das actividades principais da tarde: o concurso de habilidades, no que participaron unhas 30 persoas, divididas en catro categorías segundo a idade.

O circuíto combinaba diferentes fundamentos do baloncesto. Cada participante tiña que completar unha entrada a canastra, un pase longo, un zigzag botando o balón, un pase curto e finalizar cun lanzamento desde a liña de tiro libre de minibasket.

Todo o percorrido realizábase contra o cronómetro.

Durante os primeiros intentos comprobouse que algunhas das probas resultaban especialmente complicadas para os máis pequenos, polo que a organización estableceu un máximo de tres intentos en cada estación antes de poder continuar. Deste xeito conseguiuse manter o ritmo do concurso sen perder o carácter lúdico da actividade.

E precisamente unha das participantes máis pequenas acabou converténdose nunha das grandes protagonistas da tarde.

Gala sorprende cun tempo de 20 segundos

Gala Castro, xogadora do BMB e integrante da categoría máis pequena, non puido chegar a tempo para participar coa súa quenda.

A organización permitiulle realizar o circuíto ao final, despois das categorías maiores e acabou revolucionando o concurso.

Gala completou practicamente todos os exercicios ao primeiro intento e detivo o cronómetro en 20 segundos, conseguindo o mellor tempo de toda a actividade, independentemente da categoría.

Na categoría correspondente aos nados entre 2021 e 2018, Gala conseguiu así a primeira posición.
Na categoría 2017–2014 produciuse ademais un empate entre dous xogadores do club, Irene Correa e Darío Castro. Para decidir a clasificación realizouse un tiro libre de desempate, no que Irene conseguiu a segunda posición e Darío finalizou terceiro.

Na categoría de maiores, Gabriel González, antigo xogador do BMB, conseguiu a terceira posición.
Parte dos postos do podio foron ocupados por participantes alleos ao club, polo que non foi posible recuperar posteriormente todos os seus nomes.

Os retos de tiro tamén animaron á praza

Unha vez rematado o concurso de habilidades chegaron os retos de lanzamento, nos que se animaron a participar arredor de 20 persoas, tanto xogadores do club como público que se achegara ao evento.

Os máis pequenos realizaron o lanzamento desde unha distancia adaptada, mentres que o resto dos participantes afrontaron o reto desde unha posición máis afastada. En total, sete participantes conseguiron encestar e levaron premio.

Entre os xogadores do BMB conseguírono André, Darío, Gala e Gael. Este último protagonizou un dos lanzamentos máis celebrados da tarde ao anotar desde unha distancia especialmente longa para a súa idade e forza.

Tamén conseguiron superar o reto tres persoas alleas ao club. Dúas delas, na categoría de maiores, recibiron unha gorra do BMB e un balón talla 7, mentres que o gañador da categoría dos máis pequenos recibiu unha gorra e un balón talla 5.

Un aniversario celebrado entre todo o auditorio

A tarde tamén deixou momentos que pouco tiñan que ver coa competición.

Alma, xogadora preminibasket do BMB, celebraba ese mesmo día o seu aniversario. Ao coñecelo, organización, participantes e público acabaron cantándolle xuntos o “Parabéns para ti”, convertendo o momento nunha das imaxes máis especiais da xornada.

Os máis pequenos tamén puxeron emoción á exhibición, especialmente co pique deportivo entre André e Paco para ver quen conseguía levarse a vitoria no partido inicial e o espírito competitivo tamén apareceu entre algúns participantes externos: un dos máis pequenos non puido conter as bágoas despois de finalizar segundo na súa categoría.

Dúas horas de baloncesto no corazón das Festas do Monte

O traballo da organización comezara bastante antes.

Desde as 17:00 horas, directiva, adestradores e voluntarios traballaron na montaxe da pista e das diferentes actividades. Un dos labores máis complexos foi adaptar o espazo do Auditorio de San Benito e marcar o terreo de xogo utilizando cinta de cor.

A actividade comezou ás 19:00 e desenvolveuse de maneira continuada ata aproximadamente as 21:00 horas. Mentres se realizaban as entregas de premios, parte da organización preparaba xa a seguinte actividade para reducir os tempos de espera.

Os premios foron entregados principalmente por Óscar González, tesoureiro do club, xunto con Diego Simoes.

Ademais do evento deportivo, durante a tarde mantívose un pequeno punto do club con merchandising e cantina, e aproveitouse a ocasión para entregar algúns dos premios pendentes do IX Torneo 3×3 Vila da Guarda e as pezas de cerámica realizadas polos participantes do III Campus de Verán Veraleza, posteriormente cocidas coa colaboración de Avelaiña.

Un equipo de voluntarios detrás da actividade

Na organización participaron os membros da directiva Diego Simoes, Saúl Díaz e Óscar González, aos que se sumou Iván Rodríguez durante os traballos de montaxe.

Os adestradores Mauro Rodríguez e Fran Álvarez encargáronse da exhibición e colaboraron na organización das diferentes probas.

No concurso participaron tamén Roberto Martínez, como voluntario; Saúl Díaz, responsable da cronometraxe; e Iria Díaz, encargada de rexistrar participantes e tempos.

Cristina Puertas realizou a cobertura fotográfica e de vídeo da actividade e, xunto con Roberto e outros membros da organización, colaborou tamén no punto de merchandising, cantina e entrega de premios.

Un trofeo especial das Festas do Monte

A organización das Festas do Monte quixo deixar tamén unha lembranza desta primeira experiencia.

José Gándara, en representación do comité organizador, fixo entrega ao BMB dun trofeo elaborado por O Paliqueiro, como recordo da participación do club nesta edición das festas.

O Concello da Guarda colaborou ademais facendo posible a actividade coa cesión das canastras utilizadas durante a xornada.

Unha actividade para achegar o BMB á A Guarda

Desde o club a valoración da experiencia é moi positiva

A participación foi maior da prevista, especialmente entre persoas que non forman parte actualmente do BMB, demostrando que levar o baloncesto a espazos abertos e integralo dentro dunha celebración tan importante como as Festas do Monte pode ser unha excelente maneira de achegar este deporte a novos públicos.

Ao finalizar a actividade, varios pais e nais achegáronse á organización para preguntar polos adestramentos e pola posibilidade de que os seus fillos e fillas se incorporasen ao club na nova tempada.

Unha resposta que anima ao BMB a pensar xa en repetir a experiencia en futuras edicións, mellorando a organización e aumentando o número de persoas encargadas das diferentes probas para conseguir aínda máis fluidez entre actividades.

Dúas horas de baloncesto, competición, risas e convivencia no corazón da Guarda, e sobre todo, unha nova oportunidade para demostrar que o baloncesto tamén forma parte das Festas do Monte.